Centos de persoas pasaron durante a mañá pola feira e aproveitaron para coñecer as instalacións do centro de traballo colaborativo “Transformando en Brión”
Gran éxito de participación e vendas na segunda edición da Feira Labrega de Brión, organizada polo Concello de Brión e Daquí Darredor espazos colaborativos de transformación de elementos caseiros, que hoxe estará aberta ata as 19:00 horas na segunda e terceira planta do centro comercial Monte Balado. O alcalde de Brión, José Luís García, visitou esta mañá a vintena de postos de artesanía e alimentación ecolóxica instalados, acompañado por Carme Freire e Dora Vieiro, dúas das promotoras do proxecto “Daquí Darredor”.
García aproveitou o periplo “para desexar a todos os artesáns unha boa xornada de vendas, aproveitar para facer algunhas compras porque a calidade dos produtos é extraordinaria, e tamén para convidalos a participar no proxecto colaborativo Transformando en Brión, que inauguramos onte mesmo e que é froito da colaboración do Concello de Brión, a Deputación da Coruña e do GDR Terras de Compostela”.
De feito, durante toda a mañá centos de persoas se achegaron ata as instalacións do centro de coworking brionés, onde non foron poucos os que transmitiron o seu interese en sumarse á iniciativa. “Estamos falando de poñer en valor os nosos alimentos e darnos conta que podemos consumilos a diario ou mesmo vendelos, porque son un produto de calidade e agora dispoñemos dunhas instalacións perfectamente equipadas para a súa transformación”, explica Carme Hermida.
A variedade de produtos ofertados nos 21 postos presentes é comparable á variedade na súa procedencia. Dende empanadas de Noia a rosca de Ames, de marmelada de pemento de Herbón a pimentón de La Vera ou froitas de Brión. Canda eles, queixos de todos os estilos (tradicionais, con noces, de cabra…), ungüentos, xoias artesáns e varios postos de xoguetes tradicionais, que fixeron as delicias dos máis pequenos, para os que tamén houbo contacontos sobre alimentación responsable e obradoiros.
Paralelamente á feira houbo tamén actividades programadas como a música, cos cantos de cego de Francisco Romualdo pola mañá e as Pandereteiras de Brión e o alumnado da Escola de Música Magariños pola tarde. Así mesmo, durante a mañá houbo unha cata de froita de temporada moi concorrida, así como un obradoiro de elaboración e degustación de conservas. Para a tarde queda unha degustación de cociña con hortalizas frescas e en conserva, así como dous obradoiros para a rapazada, de batucada e de arqueoloxía.
